小編最鍾意食麵,食落肚暖笠笠, 即刻會有種滿足嘅感覺, ☺️ 所以成日都去食車仔麵, 因為可以揀勁多餸! 😂😂 返工附近見到有間車仔麵檔 — 「饔車仔麵 」新開張,梗係要試下啦! 😏 「饔車仔麵 」環境乾淨企理, 店內係用畫紙仔落單, 咁就唔怕有太多聚集係到等叫餸落單啦! 麵底選擇都幾多, 除咗一般嘅粗幼油麵、米粉、河粉、公仔麵、出前一丁,仲有淮山麵! 醬汁選擇多, 有腩汁、滷水汁、沙嗲醬,仲有秘製辣醬~ 📌 可以揀多於一個醬汁架! 😏 正常車仔麵會有嘅餸都有, 每款餸 $8 起,都算合理~ 除咗自選車仔麵之外, 仲有套餐比選擇困難症嘅食客, 咁就可以一次過試晒所有特色小食啦! 😏 我第一次黎,所以都叫咗個招牌饔麵套餐, 有 7 個餸之多:自家製蝦條、柱侯牛腩、瑞士雞翼、咖哩魷魚、手工韭菜雲吞、沙嗲豬紅、時菜, 仲包埋飲品, $65 ,好抵喎! 如果套餐有唔想食嘅餸,都可以剔除佢! 就好似我都走豬紅~ 😂 小編揀左米粉, 米粉份量都幾多,男人食,唔加底都夠飽! 😏 而且好欣賞佢自家製嘅沙嗲汁, 唔辣嘅,但幾香幾惹味! 🌟 推薦 ❗ 自家製蝦條 外皮炸得好香口,最重要係外層冇包多層炸粉, 浸左湯都唔會浸腍晒,一 pat 野咁。 👍🏻 食落啖啖蝦肉,爽口彈牙, 仲保持到蝦嘅鮮香! 🌟 推薦 ❗ 柱侯牛腩 肥瘦比例啱啱好, 肉質稔滑,不過味道偏甜, 有種食極都唔夠喉嘅感覺, 如果我下次嚟,值得散叫 😂 ! 🌟 推薦 ❗ 手工韭菜雲吞 真心皮薄餡靚! 皮好滑,餡唔會包得太滿,份量啱啱好, 韭菜鹹香,仲有原隻鮮蝦係裏面! ☺️ 以上三款,係下次去必會叫嘅餸! 其他餸就不過不失, 瑞士雞翼瑞士汁味唔係太突出, 咖哩魷魚就唔係幾入味,有種魷魚還魷魚,汁還汁嘅感覺, 不過整體來說, 絕對係可以食過返尋味嘅車仔麵。 ☺️👍🏻 地址: 饔車仔麵 ( 長沙灣 ) 長沙灣青山道 473A 號地舖 營業時間: 星期一至六: 11:00-21:00 星期日休息