由2016幫襯至今,冇一次令我失望過嘅「玫瑰餐廳陳儀興」,
最近見到佢上左蘋果新聞「米芝蓮大廚工廠區開茶記」,
先知原來老闆係前米芝蓮大廚,
唔怪得一直以黎嘅食物都咁有水準,真係失敬失敬。🙏🏾
作為附近居住嘅街坊,
區內真係冇咩港式茶餐廳係稱得上為好食,
而「玫瑰餐廳陳儀興」一直都係我茶餐廳名單中排名三甲之內,
見到新聞之後,又想心思思黎食過返尋味。😂
茶記晚市都離不開小菜和火鍋,
不過小編鐘意打邊爐,
而「玫瑰餐廳陳儀興」真係好真材實料,
所以每次黎都係打邊爐。
先黎個好事成雙~😏
叫半隻滋補花雕雞煲($138)就可以$38優惠價換購原價$108嘅安格斯牛肉(細),抵喎!
湯底有齊紅棗、杞子、淮山等,花雕酒香濃,香甜暖胃!
半隻雞浸泡在花雕酒裏面,
雞件肉厚,肉質嫩滑入味。😋 🌟推薦❗️
🌟推薦❗️安格斯牛肉(細)
份量合理,
牛肉雪花均勻,
涮熟後入口爽嫩多汁,肉味豐腴!
「玫瑰餐廳陳儀興」大部分火鍋配料都可以雙拼,
倆口子都可以試多幾款野食啦!
響鈴卷、蟹籽丸(雙拼$40)
響鈴卷即叫即炸,
就咁食得,吸湯食都得!
鮮豬潤、鮮肉青(雙拼 $50)
鮮豬潤厚薄適中,都幾新鮮,口感爽得黎又夠嫩滑。
鮮肉青和平常豬頸肉嘅賣相相似,肥瘦相間,
嚐起來比普通豬頸肉更爽嫩鮮香~👍🏻
上次食過「玫瑰餐廳陳儀興」嘅松露墨魚丸($98)覺得好好食,今次要再encore!😏
自家製嘅墨魚丸,
仲有粒粒墨魚肉係裏面,口感爽彈,墨魚香十足,
黑松露亦毫不吝嗇,味道香濃,keep得住水準!🌟推薦❗️
最後要杯火鍋限定嘅大飲特飲,
加$18就可以追加原價$31嘅特大杯裝汽水,
雖然都只係得一罐汽水,
不過自己倒感覺冇偷工減料。
地址:
玫瑰餐廳陳儀興 (新蒲崗)
新蒲崗爵祿街33A-37A號百勝工廠大廈地下
營業時間:
星期一至六:07:00-22:30
星期日休息
留言
張貼留言