之前係銅鑼灣返工,
去過「天天海南雞飯」食過lunch,
覺得唔錯!
去開Fashion Walk剪頭髮,
順便再黎朝個聖。😏
集新加坡四間米芝蓮推介於一身,
包括天天海南雞飯、老街坊、超好麵和五十年代,菜式多樣化。
蒜泥黑豚($88)
薄薄嘅黑毛豚白肉包住爽脆嘅青瓜,
加上秘製蒜泥醬汁,相當惹味,值得一試!
「天天海南雞飯」顧名思義,最出名梗係食海南雞啦!😂
🌟推薦❗️天天海南雞(例牌)($158)
嘩,無諗過例牌都咁大份!
雞肉超嫩滑,雞皮爽滑,
肉厚零脂肪,即使係雞胸都絲毫不嚡,
重點係,淋上熱騰騰嘅秘製雞汁,好惹味呀!☺️
仲有清新爽口嘅青瓜條墊底,
可以去一去雞肉嘅膩感。
旁邊配上三款秘製醬汁:
新加坡黑醬油、辣椒醬和蒜醬,
蘸上雞肉更加惹味!😋
不過其實唔蘸任何醬汁,都夠晒雞味!😂
食海南雞點少得油飯!
🌟推薦❗️天天石窩雞飯($48)
呢到係一至二人份量,
雖然睇落去好似太多咁,
但我地兩個人食真係啱啱好!
利申小編係一個超級唔鐘意食飯嘅人,
平時都只係食餸only,
不過媽咪話食海南雞,一定要送飯,😂
所以就係咁樣啦~
原個石窩上枱,
油飯粒粒分明,散發濃郁香氣,唔會太油膩或太濕,正!😋
最重要係有個石窩可以保溫,
食海南雞必食!😎
🌟推薦❗️水煮和牛($148)
水煮牛肉係一道傳統嘅川菜,
無諗過呢到都有得食😂。
入口香濃麻辣,幾惹味!
水煮牛肉片份量多,肉質嫩滑有嚼勁,
食得出係有質素嘅牛肉,不錯吃!
身為牛油果控嘅小編,梗係唔會錯過牛果奶昔($42)
牛油果香滑無比,奶味香濃,但又唔會蓋過牛油果香,牛油果控必試!😏
蔗梨薏茶($38)
以甘蔗、雪梨、薏米,
配碧螺春綠茶調成,
大大杯,價錢都算合理,
綠茶香氣幾突出,味道清甜潤喉,
用外賣茶飲杯盛載着,
堂飲飲唔晒,拎住走都得!
🌟推薦❗️天天特式豆腐花
係免費架!正啊!😌
豆腐花用杏仁來秘製,
質地綿滑,杏仁味重,啱晒媽咪食!😂
地址:
天天海南雞飯 (銅鑼灣)
銅鑼灣Fashion Walk京士頓街9號H2舖
營業時間:
星期一至日:12:00-15:30,18:00-00:30
留言
張貼留言